നെയ്യാറ്റിൻകര: നെഞ്ചുവേദനയെ
തുടർന്ന് ചികിത്സയ്ക്കായി നെയ്യാറ്റിൻകര ജില്ലാ ജനറൽ ആശുപത്രിയിലെത്തിയ മധ്യവയസ്കൻ
ക്യൂവിൽ നിൽക്കുന്നതിനിടെ കുഴഞ്ഞുവീണ് മരിച്ച സംഭവത്തിൽ ആശുപത്രിക്കെതിരെ ഗുരുതര
ചികിത്സാ വീഴ്ച ആരോപണം ഉയർന്നു. നെയ്യാറ്റിൻകര കൂട്ടപ്പന സ്വദേശിയും റെയിൽവേ
സ്റ്റേഷന് സമീപം താമസക്കാരനുമായ രാജേഷ് കുമാർ (52) ആണ് മരിച്ചത്.
ബുധനാഴ്ച രാത്രി ഏഴുമണിയോടെയായിരുന്നു സംഭവം.
നെഞ്ചുവേദന അനുഭവപ്പെട്ട രാജേഷ് കുമാറിനെ അയൽവാസി ഓട്ടോറിക്ഷയിൽ ആശുപത്രിയിലെ
കാഷ്വാലിറ്റിയിൽ എത്തിക്കുകയായിരുന്നു. ഹൃദയാഘാത ലക്ഷണങ്ങളുണ്ടെന്ന്
അറിയിച്ചിട്ടും ഉടൻ ഡോക്ടറെ കാണാൻ അനുവദിക്കാതെ ക്യൂവിൽ നിൽക്കാൻ
നിർദേശിച്ചെന്നാണ് ബന്ധുക്കളുടെയും നാട്ടുകാരുടെയും ആരോപണം.
അരമണിക്കൂറിലേറെ സമയം കാത്തുനിന്നതിനിടെയാണ് രാജേഷ്
കുമാർ കുഴഞ്ഞുവീണതെന്നും, തുടർന്ന് ഡോക്ടർ പരിശോധിച്ചെങ്കിലും
ജീവൻ രക്ഷിക്കാനായില്ലെന്നും ബന്ധുക്കൾ ആരോപിച്ചു. രോഗിക്ക് സമയബന്ധിതമായി അടിയന്തര
ചികിത്സ നൽകിയില്ലെന്നും ഇവർ ആരോപിക്കുന്നു.
സംഭവത്തെ തുടർന്ന് ആശുപത്രിയിൽ സംഘർഷാവസ്ഥ
രൂപപ്പെട്ടു. ബന്ധുക്കളും നാട്ടുകാരും വിവിധ പൊതുപ്രവർത്തകരും ആശുപത്രിക്കുമുന്നിൽ
പ്രതിഷേധിച്ചു. ചികിത്സാ വീഴ്ചയെ തുടർന്ന് മരണത്തിന് ഉത്തരവാദികളായവർക്കെതിരെ
നടപടി സ്വീകരിക്കണമെന്നാവശ്യപ്പെട്ട് മൃതദേഹം ഏറ്റുവാങ്ങാൻ ബന്ധുക്കൾ ആദ്യം
വിസമ്മതിച്ചു. സംഭവവുമായി ബന്ധപ്പെട്ട് പോലീസും ആശുപത്രി അധികൃതരും ബന്ധുക്കളുമായി
ചർച്ച നടത്തി.
സംഭവസമയത്ത് കാഷ്വാലിറ്റിയിൽ ഒരു ഡോക്ടർ മാത്രമാണ്
ഡ്യൂട്ടിയിലുണ്ടായിരുന്നതെന്ന് ആശുപത്രി വൃത്തങ്ങൾ അറിയിച്ചു. മുമ്പ് രണ്ട്
എൻ.ആർ.എച്ച്.എം. ഡോക്ടർമാർ ഉൾപ്പെടെ മൂന്ന് ഡോക്ടർമാർ രാത്രി
ഡ്യൂട്ടിയിലുണ്ടായിരുന്നുവെന്നും, നിലവിൽ ഡോക്ടർമാരുടെ കുറവ് സേവനത്തെ
ബാധിക്കുന്നുണ്ടെന്നും ജീവനക്കാരുടെ ഭാഗത്ത് നിന്ന് സൂചനയുണ്ട്.
സംഭവത്തിൽ ഡ്യൂട്ടിയിലുണ്ടായിരുന്ന സുരക്ഷാ
ജീവനക്കാരനെ അന്വേഷണവിധേയമായി മാറ്റിനിർത്തിയതായി ആശുപത്രി സൂപ്രണ്ട് അറിയിച്ചു.
അതേസമയം, സംഭവത്തെക്കുറിച്ച് ആരോഗ്യവകുപ്പ് റിപ്പോർട്ട് തേടിയിട്ടുണ്ട്.
റിപ്പോർട്ടിന്റെ അടിസ്ഥാനത്തിൽ തുടർനടപടികൾ സ്വീകരിക്കുമെന്ന് അധികൃതർ അറിയിച്ചു.
സംഭവത്തിൽ ബന്ധുക്കൾ ഉന്നയിച്ച ചികിത്സാ നിഷേധവും
മറ്റ് ആരോപണങ്ങളും അന്വേഷണത്തിലൂടെ സ്ഥിരീകരിക്കാനുണ്ട്.